Аскиа луныс пансьö талун (на коми языке)

«Ми - Россияын олысьяс»  форум вылын медся пöсь сёрниыс вöлi, пöжалуй, Президент Владимир Путинöн 2008 вося февральын йöзöдöм «Туйвизь 2020 - том йöзлöн туйвизь: аскиа луныс пансьö талун» уджтаслы сиöм секцияын, кытчö волiсны медся унаöн. Сэнi видлалiсны, мый медся ёна майшöдлö том йöзöс.

Кыдзи тыдовтчис, öнiя ныв-зон ёнджыка мöвпапöны, кутшöм профессия бöрйыны, медым бöрыннас позис аддзыны удж. Сiдзжö найöс майшöдлö оланiн, ичöт нажöтка. Сыктавкарса госуниверситетысь физика да математика факультетса декан Вячеслав Антоновлöн кывьяс серти, талун 43 прöчент школа помалысьыс водзö велöдчыны мунöны Комиысь бокö, бöрсö жö чужанiнас бергöдчö сöмын 5 прöчентыс. Гöрöдсö разьны пö позис эськö воддза моз: мöдöдны том специалистöс сэтчö, кöнi эм удж, но унджыкыс сувтiсны талы паныд, а подулалiсны сiйöн, мый уналаын абу оланiн, омöль туйяс, ичöт нажöтка, а гырысь карьясын позьö аддзыны бур удж.

Йöзöс велöдан министерствоысь специалист Валентина Горова серти, колö вежны томьяслысь видзöдлассö сы вылö, кöнi бур, а кöнi лёк овны-уджавны. Та могысь быдтыны найöс патриотьясöн. Сиктлы бур специалистьясыс колöны карын дорысь ёнджыка на. Таысь öтдор, государство отсалö налы уна ног, сы мында уджтас лöсьöдöма, — пасйис сiйö. Асьныс жö том йöз чайтöны, мый государстволы колö бурджыка тöждысьны студентьяс да том специалистьяс вöсна, вичмöдны унджык сьöм оз сöмын производствоö, но и социальнöй юкöнö, велöдöмö, наукаö, выль технологияясö. Колö кокньöдны олöмсö и том семьялысь, вöчны сiдз, медым найö вермисны босьтны субсидия патера вылö, ас керка улö му. Медым содiс странаын олысьыс, колö ышöдны и бать-мамöс. Шуам, коймöд кага чужигöн сетны патера либö вичмöдны та вылö сьöм.

Чукöртчöмаяс сiдзжö вöзйисны вынсьöдны томьяслы инмысь оланпасьяс, кöнi эськö вöлi индöма налысь правояс да кутшöм отсöг сетö государство, лöсьöдны меставывса асвеськöдлан тэчасьясын том йöзлöн делöяс кузя торья юкöн.

Россияса войтырлöн ассамблея сöветöн веськöдлысьöс медводдза вежысь Светлана Смирнова аттьöалiс форумсö дасьтысь-котыртысьясöс, республикаса Юралысьöс да правительствоöс, «Единая Россия» партиялысь Коми ютырöс. Сiйö пасйис, мый татшöм чукöртчылöмыс зэв тöдчана страналы и том йöзлы. Тадзи найö тöдмасьöны мукöдлаын олысь тшöтшьяяскöд, налöн культураöн, велöдчöны пыдди пуктыны ассьыныс да мöд национальносьта войтырлысь традицияяс, мöд Енлы эскысьöс. Тайö отсалас налы пöртны олöмö и «Стратегия-2020» уджтассö.

Светлана Константиновна тöдчöдiс, мый татшöм чукöртчылöмьясыс нöшта мунасны страналöн некымын регионын. Налöн подув вылын лоö лöсьöдöма том йöзлысь «Ми - Россияын олысьяс» выль öтмунöм.