Комиöн рочö вуджöдтöг (на коми языке)

Англияысь учёнöй Джон Гордон Коутслы тавося август тöлысьö тырис  эськö 90 арöс. Некымын во сайын сiйö кувсьöма.

Коми литература туялысьяс пöвстысь öтнас асьсö дзик коми ног нимтысь-шуысь Педöр Вань (Джон Гордон Коутс) чужлöма Англияын 1918 вося август кöкъямысöд лунö Йорк карбердса Эйкорум сиктын. 1940 воын помалöма Кембриджса университет. Буретш сiйö кадö пансьöма Мöд мирöвöй война. Сэтчö том Джон тшöтш ветлöма, тышкасьöма фашистъяслы паныд Италия бердса Корсика дi вылын. А 1944 воö сiйö Канадаысь кык венгркöд самолётсянь чеччыштöма Венгрияö кыпöдны сэтчöс олысьясöс фашистъяслы паныд. Джон Коутсöс кутöмаöсь да йöртöмаöсь дзескыдiнö. Сэтысь пышйöма да веськалöма Гöрд Армияöн мездöминъясö.

Сэксянь Джон Гордон Коутс кутöма пырöдчыны финн-йöгра кывъясö. Медводз велöдöма венгр кыв. Сэсся сiйöс пондöма кыскыны коми кыв да литература. А сыöдз уна во уджалöмадипломатöн Гаагаын, Венаын, Москваын, Хельсинкиын. Сэсся туялöма коми литература Р.Скотт нима Полярнöй институтын да 1968 воын дорйöма философияса доктор ним вылö «Oнiя комизыряна литература вылö видзöдласъяс» диссертация. 1974 да 1985 воясö волöма Сыктывкарö. 1985 воын ачым кывзi сылысь «Коми кывйын англия кывйысь пырöм кыввор» доклад. Сэсся сёрöнджык, 1990 воын, Венгрияса Дебрецен карын финн-йöгралöн войтыркостса VII конгресс вылын тöдмаси матiсяньджык нин. Мыйтакö письмöасим, вежпасим литератураöн да юöръясöн.

Шензьöдö миянöс ачыс Джон Гордон Коутсыс, кыдзи Коми муысь да коми йöзысь ылын олiгöн мортыс велалöма лыддьыны коми литературасö веськыда, рочö вуджöдтöг, судзöдöма уна кывкуд, небöг да туялан удж. Му шар пасьтала сы кодь мортыс суйöр сайын сöмын некымын и эм. А 60-öд воясын, гашкö, эз на и вöвлы татшöмыс. Роч йöз пöвстын, Сыктывкарын кöть мукöдлаын,татшöмыс абу. Весигтанi уна во чöж олысь роч гижысьяс да туялысьяс коми кывбур да проза рочöдöны сöмын водзвыв дасьтöм подстрочник серти. Тайö нин унатор висьталö Педöр Ваньлöн вылыс тшупöда тöдöмлун йылысь. Жаль öтитор—сыöн гижöм диссертацияыс некöн на абу йöзöдöма, ни англия, ни роч, ни коми кыв вылын. Талун ми казьтыштам Джон Гордон Коутсöс, комиöн кö, Педöр Ваньöс, коми литература туялысьöс да Му шар пасьтала нимöдысьöс. Коми му весьттi, тöдöмысь, сылöн лолыс тшöтш лэбавлö.