Тöдам челядьдырсянь (на коми языке)

Аня да Маша Матюшева чойяс велöдчылiсны Сыктывкарса коймöд номера школаын, Уна во тайö  школаас туялöны Илля Васьлысь олан туйсö да творчествосö, а Аня да Маша мöвпыштiсны лöсьöдны поэтöс да учёнöйöс казьтылан пöв. Таын налы отсасис мамыс, Ольга Михайловна. Школа стенмын öшалысь пассö восьтiм тöв шöр 25 лунö,

Илля Вась поэтöс ми тöдам челядьдырсянь. Сылысь мойдъяссö да кывбуръяссö лыддьылiсны миянлы детсадйын. Радейтöны сылысь гижöдъяссö и верстьö, и олöма йöз.

Василий Ильич Лыткин учёнöйкöд ми тöдмасям школаын нин. Сыöн гижöм небöгъяс серти велöдчис коми войтырлöн эз öти кöлена.

Кузь туй вуджис Илля Вась, и тайö туйыс эз вöв кокни. Но сьöкыдлунъяс вылö видзöдтöг учёнöй пыр зiлис кыпöдны да сöвмöдны коми кыв. Кывбуръяса медводдза небöгыс сылöн петалiс 1927 воын, и быд гижöдын тыдовтчö коми кывлöн мичыс.

Ог вермöй казьтышттöг кольны, мый Василий Ильич быдмис сьöкыда. Кор ичöтик Васялы вöлöма кык арöс, батьыс вöрын доймöма, пöрöдчигöн увйыс чеччыштöма да. Сылöн кувсьöм бöрас мамыслöн ки вылö кольöмаöсь нёльöн: куим вок - кöкъямыс арöса Степан, вит арöса Петыр да кык арöса Вася, да налöн пöрысь пöчыс. Уджыс Васялы уна вичмылiс, квайт арöссянь пинёвтiс, сизимсянь куртiс, öкмыссянь ытшкис. Эз кокни вöв мамыслы, Мария Васильевналы, сувтöдны пиянсö кок йылö. Ачыс грамотатöм, но куимнанныслы сетiс позянлун велöдчыны. Тентюковса да карса школаяс помалöм бöрын Василий велöдчö Тотьмаса семинарияын, сэнi жö босьтчö и гижны.

Учительскöй семинария бöрын Василий Ильич веськалö война вылö, революция бöрын недыр кежлö волö гортас, а сэсся бара гражданскöй война, тышкасьö Кай-Чердынскöй полкын. Еджыдъясöс вермöм бöрын мунö велöдчыны Москваса университето, сэнi жо помало и ас-пирантура. Тöдöмлунсö кыпöдöм могысь ветлö Финляндияö, Германияö, Венгрияö. Со мый сы йылысь гижлiс Финляндияса академик Эркки Итконен: «Пержскöй кывъяс туялöжын Василий Илъич Лыткин вöчис зэв уна, гижис тайö кывъясыслöн гражжатика, лексика, диалектология йылысъ некыжын тöдчана небöг».

1923 восянь коми, перым-коми, удмурт кывъяс да налысь сёрнисикасъяс туялöм могысь Василий Ильич ветымынысь кымын ветлö экспедицияö. И пыр ыджыд вынöн дзирдалiс поэтлöн да учёнöйлöн енбиыс. 1943 воын дорйö кандидатлысь диссертация, а куим во мысти нин лоö филологияса докторöн, нöшта во мысти - профессор нин. Уна во уджалö СССР-са наукаяс академиялöн кыв туялан институтын. 1958 воö сiйöс примитöны гижысь котырö. 1969 воö Василий Ильич Лыткинöс бöрйöны Финляндияысь наукаяс академияса членöн, 1977 воын - Гамбургын йöзкостса котырö да Будапештын венгерскöй филологиялöн обществоса почётнöй членöн. Сiйö - Коми АССР-са наукаын да техникаын заслуженнöй уджалысь, Коми АССР-са госпремияа лауреат.

Но эз пыр югыд да гажа вöв Илля Васьлöн олöмыс. 1933 воын сiйöс мыждöны контрреволюцияын да вит во кежлö пуксьöдöны дзескыдiнö. Бöрынджык, 1938 вося мартын, поэт гижö та йылысь «Гöгöрвои» кывбурын:

Вит во мöвпöй менам шöйтiс,

Вит во нидзув йирис дум,

Вит во садьöй менö нöйтiс,

Увгис сьöлöм пытшкын дум.

Мыйысь Сöвет власьтыс

мыждiс,

Кор ме мыжсö эг вöч, эг?

Тайö мöвпыс сьöлöм пытштi

Би киньöн визьялiс век.

Тайö (öнi гöгöрвои)

Ягода-бандитлöн уджi

Менö, сöвет мортöс, сёйис, -

Туй мед пежлы вöлi кушi

Сöмын гöгöрвои талун,

Лои югыд, сöдз юр вемi

Шондi югöр усьö алöй„

Сьöлöмын оз сутшкы ем.

Гежöда сэки пукалан кадсö чинтылiсны, но Василий Ильич Лыткин вит во пыдди куимöс вöлi дзескыдiнас. А 1956 вося йирым 2 лунö сiйöс реабилитируйтöны. Некутшöм мыж сылöн эз вöв да.

1981 вося август помын Василий Ильич Лыткин кувсис. Сылöн колины кывбуръяс, на серти ми велöдчам радейтны чужан мунымöс, мам-батьöс.