Выль рöмъясöн петкöдлö олöмсö (на коми языке)

Оз ков уна висьтавны поэтесса Галина Бутырева йылысь. Сылöн сiдз шусяна верлибрöн гижöм кывбуръясыс сiдзи и тшöктöны мöвпыштлыны олöмлöн медся видзчысьтöм петкöдчöмторъяс йылысь. Быттьöкö тэнад син водзын выль ногöн, дзик выль рöмъясöн воссьö тöрытьяыс и талунъяыс, збыльыс и некор на аддзывлытöмторйыс. Найöс лыддьöм бöрын тэнад вежöрыд озырмö кутшöмкö аслыссикас выль мöвпъясöн.

И со миян водзын сылöн «Лов шы» выль небöг, кодöс лэдзис «Кола» издательство. Сэтчö Иван Куратов нима государственнöй премияа лауреат аслас выль кывбурьяскöд тшöтш пыртiс и бöрья ..кадö вуджöдöмаяссö. Oтилаö лои чукöртöма Японияса, Эстонияса, Латвияса, Россияса, США-са да мукöд странаса гижысьясöс.

«Лов шы» небöг чукöрöн автор быттьö кöсйö тöдчöдны, мый Му шарлöн быд пельöсын вермöны овны öти лов шыа, öтмоза мöвпалысь, чужанiнсö радейтысь, мортöс пыдди пуктысь йöз. А сiдзкö — öти вира, ас йöз.

И нöшта öти мöвп воö юрад, кор лыддян Галина Бутыревалысь вуджöдöмасö: кутшöм озыр миян кывным, быд мукöд кывлы воча позьö аддзыны колана стöч, мича вежöртас.

Эскам, тайö небöгыскöд тöдмасьöм бöрын коми лыддьысьысь мöд ногöнджык видзöдлас и чужан кыв вылас, и мирса поэзия вылö. Выль петассö лэдзны отсалiс Коми Республикаса национальнöй политика министерство.