08.09.2008 10:31
«Оз сöмын öти шыдöн-рокöн
Морт лолыс олiганым пöт,
Кор эм маэстро Скоморохов
И гудöк сералö, оз бöрд».
Юрий Васютов.
Кык во сайын «Кола» небöг лэдзанiн козьналiс чужанiн доньялысьяслы «Дзоридза му» книга. Татчö пыртöма Удораса шылад тэчысь Михаил Скомороховлысь бöрья кадся сьылан удж: сизимдас кымын лöсьöдлöм сьыланкыв. Быд сьыланкыв гöгöрвоöдöма колана нота-пасьясöн.
«Коми книга» — удорасалöн медся гажа праздник. Быд гожöм йöктö-сьылö бур войтырыс! Горалöкылö сöдз чужан кыв, юргöны коми сьыланкывьяс. Сымда мича сарапана да калинкор дöрöма сьыланйöктан котыр öтпырйö петавлö йöз водзö! Ыджыд пай йöзлöн тайö öтувья гаж котыртöмас эм коми гижысьяслöн: найö тöдмöдöны лыддьысьысьясöс выль лыддян петасьясöн, чужан кывйöн öзйöдöны сьöлöм. Но колö кутны тöд вылын и Удораса меддона ныв-пиянсö, öд натöг эськö эз «сукмыны» тайö аддзысьлöмьясыс.
Кызь кыкöд во нин кыпыда восьлалö «Коми книга» праздник Удораöд. Быд сиктö нин пыралiс. Коми кывбуралысьяс Альберт Ванеев, Юрий Васютов ас кадö лöсьöдлiсны тайö гажаинсö, пуктiсны зумыд подув. Тайö зарни сьöлöма гижысьясыс «вуджисны» нин мöдар югыдö, кытысь бöр туйыс абу. Но юргöны Удораын сьыланкывьяс, кыпöдöны лов.
«Сьылö Черныб*,
сьылö Мукты*,
Благоев и Усогорск.
Ассьыс пайсö
быдöн пуктö,
Сöмын дышыс
тан оз ворс».
Юрий Васютов.
Быттьö чорыд унмысь чепöсйисны сикт-грездьяс! Важгорт, Пысса, Ёвкöдж, Сёльыб, Кослан да Удораса уна-уна сикт-грезд öта-мöд бöрся кутiсны кыпыда пасйыны нимлуньястö. А кутшöм гаж мыла сьыланкывтöг? Позьö шуны, Удораыс чужтiс-сöвмöдiс асшöр шылад тэчысьöс, бур сьылысьясöс.
Удораса колипкай Михаил Скоморохов лыддьö чужанiнсö Путшкымдiн (Пучкома) сиктöс, кöнi колис шуда челядьдырыс. Буретш сэк, казьтылö композитор, дас арöса зонкалы батьыс ньöбис баян. Oнöдз он аддзы Вашка вылын татшöм чудöсö! Тыдалö, сэксянь и ловзис зонка сьöлöмын сьылан сямыс.
Витöд классянь нин пондiс шогмыны пони* тушаа зонкалöн ворсан ладыс. Гортö бöрья волiгöн аддзысьлi жö Михаил Ефимовичкöд. Бура сёрнитiм. Сiйö окотапырысь вöйтчывлiс казьтылöмьясö, юксис аслас думьясöн:
—Во комын сайын Усогорскын вöлi йöзкостса сьылан котыр, веськöдлiс сiйöн роч морт, Клязьмаысь, буракö. Шань, велöдчöм морт, но пыр клубын горалiсны роч кыв вылын сьыланкывьяс. Сэксянь и пондiс майшöдлыны менö, мися, абу öмöй ас гортын коми йöзкостса сьыланыс?
Лавкаысь, помнитсьö, босьтiм Удораса поэт Альберт Ванеевлысь кывбурьястö. «Менам Мозын» — медводдза артмöм сьыланкыв. Петкöдлi сьыланногсö ёртьяслы, горöдiсны найö сьывны... Весиг Москваын, медшöр концерт нуöдан керкаын, юргис «Менам Мозын» сьыланкывйыс:
«Ныв-пилы кузь туй водзын
Ышöдан кывъяс шу.
Мозын, тэ менам Мозын,
Парматi визувтысь ю».
Альберт Ванеев.
Кытчö сöмын эз шыблавлы олöмыс? Быдлаын гижсьывлiс. Войнас локтас сьылан гласыс — некытчö воштысьны, сiдз и ковмас кытчöкö меститчыны, нотаястö гижны...
Колян июнь тöлысьын «Коми книга» праздник вылын нёль лун коставлытöг сьылiм-гажöдiм. Лун ни вой. Сьылам «ловьяöн, фанератöг». Ог радейтöй чиклясьны.
Локтö «Шондiбан», миян медрадейтана праздник. Бара колö мунны, гажöдчыны. (Тайö сёрниыс вöлi июль тöлысьын. — Ю.Я.)
Неважöн Косланын кыпыда мунiс ыджыд аддзысьлöм — Удора районлы тыри 79 во. Нимкодь, мый культура юкöнсянь, кодöн веськöдлö Лариса Королева, шань да вежавидзысь ань, пыр эм колана отсöгыс, бур кывйыс. Личкö мудзыс да, кытчö лоан? Мукöддырйиыс шулан аслыд, тырмас... Но сэк жö думыштчан: ог кö ме, кодi? Кодлыкö серавны колö, сукмöдны гажсö. Дай кытчöдз юр рöбитö*, ки ворсö, кутö баянсö, быть колö петавны йöз водзö, гажöдны бур войтырсö.
Век бурöн казьтывла Юрий Васютовöс. Сё жаль вöлi янсöдчыны тайö енбиа мортыскöд. Сымда бурсö вайис дона гижысьыс Удоралы! Дас во кымын ёртасим сыкöд, öтлаын лöсьöдавлiм сьыланкывьястö. Мыйыс и эз вöвлы... Шуам, мем колö лöсьöдны Важгорт сикт йылысь сьыланкыв. Кык час мысти нин телепон пыр шыöдчас Юрий Константинович: на пö, гиж кывьяссö... Час мысти воча звöнита сылы: мися, менам дась шыладыс. Мöд асывнас нин юргö Важгортса клубын шнич выль сьыланкыв:
«Ывлаыс шоныдöн лолалö,
Вашкаыс визувтö лöз,
Сьöкыдсö пыкöны-олöны
Танi бур сьöлöма йöз».
Коркö мöдöдчим концертасьны Ёвкöджö (Чупрово сиктö), кывьяссö гижöма нин, киын, автобус петö водз... Нёль час кымын колö зутшйöдны-мунны Ёвкöджöдз. Мунiгмоз и дасьтiм, велöдiм сьыланкывсö.
Кыдзи чужö шыладыс? Кыськö тай локтö жö-а... Сiдзсö ог пычкы лов пытшкысь. Мый локтас сьöлöмö, сiйö и шогмана. «Колiгöн öд быдтор сюрö». Кывбурыс олö юр вежöрын, пыр олö... То удж вылö, то кытчöкö мöдлаö мунан... «Мукты дорöсöйсö» дак автобусын гижсис тай.
«Мукты дорöсöй,
дзодзöг морöсöй,
Менам шуд, менам шог,
оланног».
Юрий Васютов.
Абу быд гижысьлöн гöгöрвоана кывбурыс. Ог кут казьтывны, мыйкö оз тырмы, дай ставыс... Уна вежлавны ковмывлö. Дай, кыдзи шулывлiс Юрий Константинович: «гласыс ачыс оз во, сьылан ачыс оз ло».
Альберт Ванеев — нималана учёнöй, поэт, ыджыд гижысь. Торйöн ме вылö эз гижлы. Слабог, сылöн эм кывбура уна небöг, сэсь и босьтлывлi. Пётр Бушеневлöн кывбурьяс вылö эмöсь тэчöм сьыланкывьяс. Кулöмдiнса поэт Василий Лодыгин торйöн мöдöдлывлiс ассьыс кывбурьяссö: тэныд сетi, тэ и босьт да гиж шыладсö. Окота вайöдны тöд вылö шыладöн ловзьöдöм нöшта öти кывбур:
«Видза олан, чужан муöй,
Коми войтыр, видза ов.
Мед пыр шудлун тiян туö,
Кыпыдмö да ловзьö лов».
Александра Мишарина.
Радпырысь аддзысьлывлам «Шондiбан» праздник вылын нималана коми композиторьяскöд. Михаил Оверин, Василий Гущин, Василий Чувьюров, быдöнöс он казьтышт... «Шуда гозья» сьыланкывйöн петкöдчывлi «Василей» вылын. Буретш первой премия вичмылiс. Куслiс «Шондiбаныс», но бур, мый öнi бöр ловзян выйын коми войтырлы тайö медся колана гажыс.
Ас кадö Михаил Скоморохов няжгис-ворсiс Косланса «Ловья ва» сьылан котырын. «Пöттшуйтлiс»* Удора-чужанiн йылысь выль сьыланкывьясöн. Кытшовтлiсны Удорасö дай Коми мусö, гажöдлiсны бур йöзсö. «Ловья ва» видзысьöн сiйöс нимöдлывлiс ас кадö Юрий Васютов, кывбуралысь, шылад тэчысьлöн быд лунья ёрт:
«И талун Удораным сьылö,
А мелi горыс «Ловъя ва».
Зэв ылöдз сьылöм
сылöн кылö
И водзлань
кутас кывны на».
Талун Михаил Ефимович ворсö «Визув ёль» сьылан котырын. Кöть и кывлан сысянь корсюрö мудзöн тырöм кывьяс, но эскыссьö, мый енбиа мортыс венас мытшöдьяссö да шудöдас Удора-чужанiнсö лов вöрзьöдана уна мыла сьыланкывйöн! А кыдз инö? Кодi сы пыдди керас тайöс? Гöгöрвоана, мый сьöкыд бертовтны тайö кывкутана, лов кыпöдана уджсö. Но абу мöд олöмыс шылад тэчысьлöн. Кодлыкö да колö ломзьöдны гажсö, «лöдсавны пачсö»...
Юр вежöрö локтöны рöд пуктысьяслöн буркывьяс: овны бурöнсямöн, пыртны муслун олöмас, кöнi вывтiасьö лöг; овны прамöя, веськыда сэн, кöнi кыкбанасьö лöж; кыпöдны олан гаж, мортсö кö пыкö шог.
«Няньöн-солöн сьöлöмтö он верд». Дерт, ыджыд да кывкутана мог: лöсьöдны оланiн, пöттöдз вердны-удны быд мортöс, но сьылан гажтöг дубмö олöмыс, тшыкö лов. Удора-мам пыр аттьöалö, вылö доньялö ассьыс меддона нылапиянсö, кодьяс вын жалиттöг гижöны-сертöны, славитöны Чужанiнсö! Сьыланкывтöг абу свет вылас олан шудыс, кыдзи сакартöг оз овлы юмовыс. Кор сьöлöм йöктö-сьылö, кыдз нö сэсся он сьыв да гажöд бур войтырсö?
Аймулы, дерт, ёна коланаöсь енбиа кывбуралысьяс, гижысьяс, шылад тэчысьяс, кодьяс лов öзтана уджöн содтöны шуд, вынсьöдöны олöмсö. Збыль, бурлуныс олö нэмьясöн.
Жаль, оз тырмы морттуй бур ног пасйыны шылад-кылансö, кодöс быд сьыланкывйö пыртö Михаил Скоморохов да кужöмöн вежöдö кывбурьяссö, бурöн-дзоньöн вайöдö найöс сиктса клубьясö, бур йöз водзö. Гежöда шудöдлö милы, гортысь ылыстчöм йöзлы, кывзыны мыла, лов вöрзьöдан сьыланкывьястö.
«Сöдз Вашка пыдöсыслöн питор,
Став Удоралöн дона морт,
Медводдза миян композитор,
Бур сьыланкывлöн медбур ёрт».
Юрий Васютов.
* Черныб — Чернутьево;
* Мукты — Муфтюга:
* Пони — ичöт, дзоля;
* Рöбитны — уджавны.
* Пöттшуйтны — вердны-удны, гöститöдны.
Газета "Коми му" (Республика Коми) от 6 сентября 2008 года
Автор:
Юрий Яовлев, Санкт-Петербург
