08.09.2008 10:55
Коми Республикалöн чужан лункöд йитöдын Изьва районса музейын воссис Татьяна Поповалöн торъя выставка. Мастерлöн тайö выставкаыс ветымынöд нин.
Зарниа киа ань серпасьяссö вöчалö лэбач гöнысь, турунысь, а сiдзжö вышивайтö. Сылысь уджьяссö тöдöны Комиын, Москваын, Санкт-Петербургын, Финляндияын. И быдлаын вылö доньялöны.
А та пöрйö Татьяна Геннадьевна вöзйö доньявны шöвк вылын серпасалöм картинаяс. Батик кузя тöдöмлунсö сiйö босьтöма Сыктывкарса университетын велöдчигас.
А медводдза выставкаыс вöлöма 1996 воын Изьва районса библиотекаын. Сэки Татьяна Поповалöн турунысь серпасьясыс чуймöдiсны ставнысö. А гöнысь серпасьяссö велöдчöма вöчны Сибирысь художник Анатолий Байзинлысь. Сылысь картинаяссö аддзылöма «Северные просторы» журналысь. Аньлöн выль нога петкöдчöмыс воöма йöзыслы сьöлöм вылас. И налöн ошкöмыс ышöдöма Татьяна Геннадьевнаöс водзö мыйкö выльтор вöчавны. 1998 воын аслас уджьясöн петкöдчöма Москваса Дарвин музейын. И буретш сэксянь кутöма паськыда нимавны. Татьяна Попова йылысь кутюны гижны газет-журнальясын, петкöдлыны телевидение пыр, корлыны выставкаяс вылö. Oнi сылöн коллекцияын 200 сайö удж. Мыйсюрö козьналiс республикаса, Россияса да суйöрсайса музейясö.
Серпасьясас ёнджыкасö петкöдчö войвыв вöр-валöн мичлуныс. Oти картинасö вöчö кор кык вежон, а кор и некымын тöлысь лоö уджавны. Гöнсö чукöртны отсалö верöсыс. Сiйö вöралö. Вайöны и иöзыс, кодьяс видзöны гортаныс попугайясöс да канарейкаясöс.
Ачыс Татьяна Попова Красноярскса Артёмовск карысь. Бать-мамыс воöмаöсь овны Ухтаö, кор нывкалы вöлöма 10 арöс. Татьяна ичöтсяньыс радейтлöма серпасасьны. И 8 класс бöрти пырöма велöдчыны Сыктывкарса искусство училищеö художник-оформительö. Сiйöс помалöм бöрын окотитöма овны да уджавны Изьваын. 2001 воын пырöма велöдчыны Сыктывкарса университетлöн искусство факультетö. А 2003 воын сылы вöзйöмаöсь веськöдлыны районса культура юкöнöн. Университетсö помалiс заочнöя нин. Дипломсö гижис Изьваса аньяслöн кöлысьдырса юр вевттьöд кузя.
Велöдчигас уна выльтор тöдмалiс, и вузын босьтöм тöдöмлуньясыс отсалöны аньлы талунья уджын да творчествоын. Кöсйö видлыны ассьыс сямсö гобеленын.
И дась юксьыны аслас сямнас мукöдкöд. Мöвпалö котыртны «мастер-класс». Аньлöн кывьяс серти, уналöн эм енбиыс, сöмын сiйöс колö пестыны. И вермас чужны-артмыны сэтшöм мичлун, кодi ваяс ыджыд радлун и аслыд, и йöзыслы.
Кор и удитö ставсö? Райадминистрацияын кывкутана уджысь да сьöлöм ышöдана искусствоысь кындзи Татьяна Поповалöн ыджыд семья. Дмитрий верöсыскöд, кодi уджалö механикöн АТП-ын, быдтöны куим челядьöс. Медыджыдыслы 17 арöс, мöдыс вит арöса, ичöтыс — арöсöн-джынйöна. Тöжд-нокыс накöд тырмымöн.
Сентябрь 3-6 луньясö Санкт-Петербургын нуöдсьöны Коми Республикалöн декоративно-прикладнöй искусстволы сиöм луньяс. Сэнi петкöдчö аслас уджьясöн и Изьва районысь мастер.
Газета "Коми му" (Республика Коми) от 6 сентября 2008 года
Автор:
Евгений Габов
