Чилимдiнса важся культуралы сиöма (на коми языке)

Коми Республикаын лэдзöма Чилимдiн районса духовнöй культуралы сиöм аудиодиск да кык небöг.

Кыдзи юöртiс СГУ-ысь фольклор туялан шöринöн веськöдлысь Татьяна Канева, университетса фольклорист-филологьяс да Санкт-Петербургысь РАН-лöн роч литература институтса фольклорист-музыковедьяс уна вося туясьöмьяс бöрын дасьтiсны Сыктывкарса университетысь фольклорнöй архивлöн подув вылын лирическöй сьыланкыв чукöр. Сэтчö пыртöма сё сайö сьыланкыв, кодьясöс гижалöма Чилимдiн районын 1980-2000 воясö.

Санкт-Петербургса да Сыктывкарса фольклористьяс дасьтiсны сiдзжö Пижмаса сьылысьяслы да мойдысьяслы сиöм аудиодиск, кытчö пырисны Пижма бердса сикт-грездьясын олысьясöн висьталöм сьыланкывьяс, былинаяс, инструментьясöн ворсан шылад. Дискас пыртöма 21 гижöд, кодьясöс вöлi туялöма 1965, 1981 да 1929 воясö да найöс öнöдз видзисны Санкт-Петербургса роч литература институтын. Сьыланкывьясысь да былинаясысь öтдор буклетас эмöсь гижöдьяс да фотоснимокьяс. А отсалiс сiйöс лэдзны Коми Республикаысь национальнöи политика министерство.

Нöшта öти небöглöн нимыс — «Дети и детство в народной культуре Усть-Цильмы». Сiйöс дасьтiсны Коми наука шöринлöн Кыв, литература да история институтысь да Сыктывкарса университетысь учёнöйяс. Небöгас пыртöма МГУ-са, СГУ-са да Коми наука шöринса архивьясысь, а сiдзжö Чилимдiн сиктса челядьлöн «Гудвин» шöринысь 600 сайö гижöд. Поэзияа öткымын гижöд дiнö сетöма нотаяс. Небöгас пыртöма сiдзжö челядьлöн культуралы сиöм статьяяс да кывкуд.

Кыдзи тöдчöдiс Татьяна Канева, öнiя культураö лои пыртöма пöль-пöчьяслöн важся культураысь ыджыд юкöн, кодi отсалас ёнмöдны талунья обществолысь духовнöй подувьяссö.

Газета "Коми му" (Республика Коми) от 9 сентября 2008 года