09.09.2008 12:29
Талун тырö 55 арöс «Коми му» газет редакция» Коми Республикаысь автономнöй учреждениеöн веськöдлысь, Россияса гижысь котырö пырысь Александр Васильевич Ульяновлы.
Ассьыс став олöмсö сiйö сиис журналистикалы да гижан уджлы. Сылысь гижöдъяссö йöзöдлiсны «Сельская жизнь», «Север» журналын, Коми Республикаын петысь газет-журналъясын, альманахъясын. Александр Васильевич лэдзис нин комиöн да рочöн нёль небöг. Журналистъяслöн котырын пыдди пуктöны тайö ыджыд енбиа, водзмöстчысь да шань мортсö. Буретш сылöн зiльöмöн коми газет-журналъяслы удайтчö венны налöн уджын паныдасьлысь нелючкияссö, восьлавны олöмыскöд орччöн. Александр Ульянов унатор вöчö и мукöд финн-йöгра кывъяс вылын петысь газет-журналъяскöд топыдджык йитöдъяс лöсьöдöм могысь.
Ми, удж кузя сылöн ёртъясыс, пöся чолöмалам Александр Васильевичöс олöмас гöгрöс тшупöдöн, сиам бур дзоньвидзалун, творческöй уджын выль вермöмъяс да талунъя моз жö водзö зумыда восьлавны олöмöдыс. Кузь нэм да бур шуд!
Талун йöзöдам Александр Ульяновлöн выль висьтысь юкöн, а дзоньнас сiйö петас «Войвыв кодзув» журналлöн сентябрса номерын.
...Быдса вит во Oльöксан эз вöв Эжва йылын, чужан сиктас. Сэки волiс, сiдз кö нин шуны, бöра-водз. Кык вежон олiс бать-мам ордас. Сэсся бöр мöдöдчис. Эжва йывсяньыд öд Хабаровскöдзыс абу матын, туй вылас, öтарö-мöдарöтö, отпуск джынйыд вошö.
Июль тöлысь буретш вöлi, Иван лун бöр, турун пуктан кад. Жар да мича поводдя сулалiс...
Oльöксан куйлiс гатшöн вагон жырйын да турки-тарки мунысь поездлöн шы улын бара на казьтыштлiс вит восайса волöмсö, гортас кежалöмсö. И тайö казьтылöмьяссьыс морöспань улыс шонавлiс, сьöлöмсö быттьö выябордйöн мавтыштiсны...
Сэкисö Oльöксан водзвыв эз юöрт мам-батьыслы, мый волас гортас. Телепон пыр сöмын казьтыштiс, гашкö пö, и мöдла таво, мойвиас кö гожöмнас шойччыны. Но «гашкöыд» тай тшöкыда на кашкö. Водзвыв кöсйысян да мöдарö кö артмас, абу жö зэв мича. Пöрысь йöзтö пöрьялöма лоö. Сизимдас сайö нин кыкнанныслы, кöть эськö мöстö кыдзкö-мыйкö век на пыкöны-видзöны, ыжьясöс да.
Кулöмдiнсянь на сиктöдз кызь верст и эм. Джынйыс чорыд веркöса, Чукля шор дорöд. Коркöя власьт дырйиыс на юрсиктсянь бур туйсö вöчлiсны-лöсьöдлiсны. Но а мöд джын вылас сьöмыс абу пö тырмöма - аспальт пыдди важ туйсö кольöмаöсь, лыаöн сорлалыштöмаöсь. Тулыс-арнас, зэрас прамöя да, сё пöгиб овлö сиктсаяслы. Посни машинаяснад он и письт юрсиктöдзыд. Коркöя Сöвет кадыс быттьö ас йывсьыс пас кольöма - бурсö лёкыскöд гудыртöма. Нöк тыра гырничö карасин войт кисьтöм кодь артмöма. А öнiя олöмöн веськöдлысьяслöн бара жö чорыд веркöса туйсö помавны сьöм оз вичмы. Миян тай пыр тадзи и артмылö - öтилатi дöмлам, мöдлатi резьдö... Бур кöсьям вöчны, а помöдзыс тайö бурсö огö и вайöдöй.
Вит во сайын гожöмыс кос зэв сулалiс, мича да. Та вöсна автобусыд öдйö и тюрöдiс Oльöксанöс чужан сиктöдзыс. Час джын мысти мир туй вылын нин сулалiс, керка вевтыс тыдалiс тасянь, муртса пырыштан да тöдса йöрö люкасян.
Ольöксан шыбитiс пельпом саяс сьöкыд нопсö, босьтiс киас сера дöраысь вурöм ыджыд сумка да онялысь мир туй вывсянь кежис гортланьыс. Сьöлöмыс чепсасис-нетшкысис морöс кудсьыс, вежöрыс гудрасис, быттьö Ольöксанлы тайö здукö нöшкöн вачкисны юрас. Кодкö эм-ö гортас? Гашкö, турунöн ноксьöны Марья тьöтыслöн орчча йöрас? Либö совхозлöн вöвлöм скöт картаяс сайын ытшкöны? Сё юалöм чужис-лэбалiс Oльöксанлöн юрын, кор сiйö восьлалiс тöдса потшöс праслаяс боктi. Восьтiс ки пöвнас дзирья öдзöс, а батьыс буретш труба дорын ва чепняöн лэпталö, ведраясö кисьталö. Oльöксанлы бок ногöн сулалö да оз аддзы локтысь писö. Гöрдоват дöрöм помьяссö гач вылас лэдзалöма, резина сапöга, юрас еджговат картуз. Кисьтас чепнясьыс васö, öвтыштас кинас пель гöгöрыс - номйысь да лöддзысь дорйысьö. Найö, вир юысьясыд, кöть и жар, сы дорын жуöны-бергалöны. Ытшкытöм туруныс коскöдзыд да, сэнi, тыдалö, дзебсясьöны, ыркыдiнас.
Oльöксан лов шысö кутiс, дзоргöвидзöдö бать вылас, аслас нюмыс вомсьыс вот-вот чепöсьяс. Личалiс сьöлöмыс, ас местаас пуксис быттьö. И сэтшöм лöсьыд лои Ольöксанлöн морöс пытшкын, кöть сьыв да йöкты. Збыль öд, гортас воис. Та ылнасянь. Воис кö, шань нин, сiдзкö, ачыс Енмыс тшöктöма вылiсянь тадзисö артмыны...
- Батьö, бать! - негораа шыасис дзирья дорсянь Oльöксан.
- Мый нö? - бергöдiс юрсö пиыслань Педöр Миш да муртса чепнясö кисьыс эз уськöд. Кынмылiс здук кежлö ва труба дорас. Сэсся кывйыс сюрис жö.
- Сё лешак тай! Ылi гöсьт воöма, Oльöксан локтöма! Часлы,часлы... - жбыр пуктiс сiйö чепнясö потшöс прасла вылö да уськöдчис пи дорас. Мыйкö дольö-висьталö воча локтiгас, вом горулас, а синмыс югьялö-öзйö, шудасьыс-шудаа. Бура унаысь и топöдчылiс сартас кодь Педöр Миш пи бердас. Топöдчылас да бара. Топöдчылас да бара. Быдсöн синваыс доршасьлiс сiйö здукас Oльöксанлöн, горшас курыд ёкмыль пысасьлiс-тасасьлiс. Тайö аддзысьлöмсö казьтылiгöн, батьсö ас водзас сувтöдлiгöн, морöс улыс Oльöксанлöн пыр курдылö жö, быттьö кодкö сэнi сэрапомöн гудрасьö. Лöз сук тшыныс сэсся синсö чизöдö, синватö пычкö...
- Вай пырам, пырам, - сойбордас кутчысис пиыслы Педöр Миш. - Мамыд буретш гортын, сёйыштанюыштан, туй морт, кынöмыд кöнкö гурьялö.
Нимкодьысла батьыс изiс-висьталiс эмсö и абусö, вомсö кöть вурышт. Тöдчис: ёна гажтöмтчöма письыс Педöр Миш. Кымын во öд эз аддзысьлыны. Письмöястö эськö гижыштавлiсны öта-мöдныслы, но письмöыд тай письмö на и эм. Лов вылад мый дольсвидзö, ичöтик кабала пырыд сьöкыд висьтавны-юöртны. Письмöасигас тай батьыдлы синмас он видзöдлы ни морöс бердад сiйöс он топöдлы...
Oльöксан кын мыр моз век на сулалiс дзирья дорас да быттьö эз кыв батьсö. Гажтöмтчöма, гажтöмтчöма... Сойбордйöдыс нин со нетшкö Oльöксанöс, лок пö вай, пырам нин керка пытшкас, гортад... Нимкодь, дерт, олöма мортыдлы. Та ылнасянь Ольöксан воис да. Сэсся öд и öтка пи. Педöр Мишьяслöн медводдза быдтасыс. Питорöс тай Енмыс сетлöма. Сы бöрся нывьяс нин чужлiсны, Анна да Валя. Найö, дерт, ёна тшöкыдджыка волывлöны мам-бать дорас. Матынöсь да. Oтиыс карын олö, мöдыс - Айкатылаын. Верстьööсь нин, быдтысьöны, быдöн ассьыс поз лöсьöдöма. Позьö шуны, мам-батьыскöд орччöн олöны-вылöны. Эз Oльöксан моз мусюр йылö утёвтнымунны. Но кодлы тай мый Енмыс шулöма, сiдзи и овлö-артмылö...
- Пырам, пырам, огö жö танi кутöй сулавны, - быттьö сьöкыд унмысь садьмис Oльöксан, ачыс век на эз эскы син водзас чепöсйöм öнiя серпасыслы, орччöн жöдзысь батьыслы, сы киöн пуктылöм пашкыр кыдзьясыслы, кодьяс мича платтьöа нывьяс моз тшапа сулалiсны на йöр пытшкын.
Сiйö кокниа лэптiс пельпом вылас дзирья дорысь сьöкыд нопсö, шуйга киас босьтiс дöра сумкасö да воськовтiс бать бöрсяыс, керка кильчöлань.
- Эн тэрмась, мамтö шензьöдам, - югнитiс синмыс косiник батьыслöн.
- Мед сöмын сьöлöмыс эз сувт-а... Вай коктö пöрччы öдзöс дорас да гусьöникöн пырам. Мед мамыд чуймалыштас...
Лов шысö кутöмöн батя-пиа кайисны кильчö вылö, сэсянь посводзö пырисны. Танi ставыс сiдзи жö вöлi, кыдзи и уна во сайын. Нинöм абу вежсьöма. Сöмын тай, тыдалö, посводз джоджсö выльысь краситöмаöсь, югыд гöрд рöма öнi. Пыран да шуйга пельöсас ыджыд пызан сулалö, сы вылын ва ведраяс пукталöма, муртса водзынджык, тувьяс йылын, важ кöлуй öшалö, пупайка да мый да, на улын быдсяма кöмкотыс радöн-радöн. Посводзсяньыс и сарайö, и чуланö, и керка пытшкö веськалан. Кеж, кодарö окота.
Батьыс кыскыштiс асланьыс керка öдзöссö да воськовтiс порог вомöн. Сы бöрся и Oльöксан. Сьöкыд нопсö пельпом сайсьыс лэдзис, сера сумкасö шуйга киас кутö. Бать бöрся жö пырис, бокö эз кеж. Пырис керкаас, пачводз бокö, а батьыс пызан дорын нин тапикасьö, ышлолалö да вомгорулас мыйкö ас ногыс мургö.
Мамыс сiйö кадö пыдi жырьяс вöлöма, плита пач костас бурдöдчан туруньяс косьтыны öшлö. Батьыс и горöдiс Павел Катялы:
- Мыйкö ноксян сэнi. Лок, пет вай таланьö. Ылi гöсьт öд воис...
- Мый сэнi мен ылiсянь горзан, - кылiс пыдi вежöссянь мамыслöн тöдса гöлöсыс. - Лок татчö да висьтав ставсö лючки-бура.
- Висьталан бурсö да нöшта мы-жаöн колян, - броткыштiс нимкодясьысь батьыс, тöдiс Oльöксан: мамыслы паныд Педöр Миш вочатö гежöда шулiс. Шуас да аслыс жö и сюралас. Мый сэсся вöчан, тадзи кö артмö налöн öта-мöд костас. Быттьö и гач новлö батьыс, а кывзысьны тай на лоö нывбабаыдлысь.
- Пет, пет вай сэтысь, аслад пач костысь, - сирасис мамыс дорö керка шöрсянь Педöр Миш. - Мися, та ыджда гöсьт локтiс, а тэ быттьö пельтöм поп нускан ассьыд...
Ачыс эз пыр мöдар вежöсас, жöдзис-сулалiс Ольöксансянь неылын.
- Мый тэ сэнi, меным кывтöг, керкасö шызьöдан, - кылiс бара пыдi вежöссяньыс. - Пыр татчö да висьтав ставсö. Али полан, бара нин кыськö кокыштöмыд да?
- Эн сöр вай, войт эг ю, - мыжа морт моз видзöдлiс пиыс вылö Педöр Миш. - Тöрыт сöмын тяпкöдчыштi, а талун дзик сöстöм...
Сы костi Oльöксан пуктiс ыджыд нопсö да дöра сумкасö гöбöчö пыран öдзöс дорö да морöс тырнас апыштiс вунöдлöм нин гортса сынöдсö. Аслыспöлöс сынöдсö, сiйö öвтiс и пызан вылын куйлысь веж лук кöрöн, и яя шыдöн, и пöжалöм кöвдумöн. А керка пытшкас быттьö нинöм абу и вежсьöма сылöн бöрья волöмсянь. Енув пельöсас нэмöвöйся пызаныс сулалö, сэнi чашка-пань, гöгрöс югыд самöвар, пызан дорас тöдса улöсьяс, еджыд краскаöн мавтöм стенас - пöль-пöчыслöн фотокарточкаяс, мам-бать вокьясыслöн да. Кыкнанныс томöн усьлöмаöсь бöрья Ыджыд война вылас, дас öкмыс арöсаясöн. Отиыс Сталинград дорйигöн, мöдыс - чужан сиктсяньыс зэв ылын, Румын муö дзебöмаöсь...
Пыдi вежöсас, кöнi мамыс ноксисöшлысис, Oльöксан эз пыр, а кежис веськыдвылö, кöрт пачлань. Горшыс косьмис да гумовтiс кöшöн лабичвывса ведраысь кöдзыд ва да горша гулькнитiс-юис кöш джынсö. Тыдалö, регыд на пыртöмаöсь. Здукöн ыркöдiс морöс пытшсö. Чöскыд и ваыс налöн ва трубаын. Майбыр, тшайтö пузьöдны, татчöс ваысла, гашкö, дас керкаысь волöны да. Мукöдыс вель ылiсянь, карнанöн и карнантöг.
Oльöксан вöлi буретш тапикасьö-видзöдалö пачводзсö, мый сэнi вежсьöма да мый абу, сэк костi и мамыс петiс мöдар вежöссьыс. Занавес сайсьыд Ольöксанöс эз пыр и казяв. Пöрыся-нэма синнад. Вувзьысис бать вылас:
- Мый нö сэнi керка тырнас юöртан-горзан?
- Ме тэныд шуи, Катя, мися, ыджыд гöсьт миянö воис. Пельтöммин дзикöдз али мый?..
- Кутшöм нö гöсьт локтiс? - джöмдiс Павел Катя, киас сунис трубича кутiг, кокьясыс коньöрöйлöн лигышмунiсны весиг.
- Ме тай со вои, ме ылi гöсьтыс, - сетiс гöлöссö Oльöксан да воськовтiс кöрт пач дорысь керка шöрлань.
- Oльöксан воöма, Господи да Енмöй, - шлапöдiс кияснас весьöпöрöм мамыс. - Мися, он нин, гашкö, волы да... Та ылнасяньыд... А со воöмыд. Енмöй дай Енмöй...
Мамыс сулалiс Oльöксанлы воча, бöрö ни водзö воськов эз сяммы вöчны, öттор Енмöс да Oльöксанöс казьтылiс, а синваыс шорöн лэччис чукырöсь чужöм кузяыс.
Oльöксанлöн вöрзис морöс пытшкыс, вазис синмыс, пи сьöлöмыд öд пи сьöлöм и эм, абу из ёкмыль. Уськöдчис мам дорас да мый вынсьыс топöдiс ас бердас вöльнöй светас чужтылысьсö.
Газета "Коми му" (Республика Коми) от 9 сентября 2008 года
