Ставыс тайö - озырлун (на коми языке)

Порогсö воськовтан да пыр жö шай-паймунан. Гöгöр зверь-пöтка мыгöръяс,   йöра да косуля сюръяс, ош да кöин юр лыяс, Быттьö аслыспöлöс керка-музейö веськалан. А став тайö зверь-пöткасö лыйлöма, наысь сэсся мыгöр-сюрсö вöчалöма да чукöртöма аслас керкаö Емдiн районса Айкатыла сиктын олысь Василий Александрович Пасынков.

Василий Александровичкöд — вöвлöм военнöйкöд, бур вöралыськöд, таксидермисткöд, зэв прамöй да шань морткöд мойвилiс меным некымынысь аддзысьлыны. Абу уна кывъя, вежавидзысь... Жаль, но, шонъянöй, матö кык во нин абу таладор югыдас. Но тайö морт йывсьыс паметьыс ловъя. И сылöн вöчöмторъясыс колины, кöть и тайö аслыспöлöс керка-музейсö вузалöмаöсь нин. А мый лоö  мыгöрсюръясыскöд, кодъясöс вöчис Василий Пасынков?

Лоа Айму дорйысьöн

Василийлы вöлöма 13 арöс, кор ыпнитöма Великöй Отечественнöй война. Сiйö ас синнас, дерт, абу аддзылöма, кыдзи креста самолётьяс шыблалöмаöсь миян кар-сиктъяс вылö бомбаяс, кыдзи фашистъяс лыйлöмаöсь йöзöс, челядьöс, кыдзи вöрöглöн танкъясыс грымöдöмаöсь-мунöмаöсь миян чужан мутi...

Но тайö войнаыс страна пасьталаысь йöзсö öтувтöма. Фронт вылö мунысь пöль, бать да вок пыдди колхозын зiльöмаöсь пöч, мам, чой да, дерт жö, челядь. Быд лунъя сьöкыд уджыс ставныслы — и олöмалы, и томуловлы — вичмöма. Ставсö фронтлы! И Айкатыласа олысьяслы тайö сэки вöлöма медся тöдчанаöн. Асьсö жалиттöг войтыр гöрöмаöсь да кöдзöмаöсь, видз вылын страдуйтöмаöсь... Сиктсаяс тöдлöмаöсь и мудзсö, и кынмалöмсö, и тшыгъялöмсö. Но некод абу ропкöма. Oд, налöн пöльясыс, батьясыс, вокъясыс свинеч шер улын тышкасисны вöрöглы паныд.

1945 вося май 9 луныс вöлöма Василий Александровичлы медся радейтана праздникöн. Буретш тайö лунас зон стöча нин тöдöма, мый лоас Айму дорйысь-видзысьöн — военнöйöн.

Сiйö аслас дженьыд на нэмнас некор ылöджык чужан Айкатыласьыс абу ветлöма. И та вылö видзöдтöг 1946 воö мунöма Ленинградö да пырöма военно-артиллерийскöй училищеö. А кадыс вöлöма сьöкыд. Сöмын на öд помасьöма вир кисьтана война. Но став сьöкыдлун вылас видзöдтöг коми зон шуöма збыльмöдны ассьыс дум-кöсйöмсö. И öд велöдчöма. А сэсся лейтенант Пасынковöс мöдöдöмаöсь первой Австрияö, сёрöнджык - Венгрияö. Налöн часьтыс вöлöма нималана Балатон ты дорын.

Офицерлöн олöм-уджыс аслыспöлöс. Сiйö служитöма то Союзын, Войвыв Кавказса военнöй округын, то бара Германияын, Потсдам карын. Василий Александрович весиг пуксьывлöма креслöö, кöнi пукавлöма генералиссимус Сталин. Буретш Потсдам карас вöлi нималана конференция, кытчö чукöртчылiсны Сöветскöй Союзса, США-са да Англияса веськöдлысьяс. Сёрöнджык тайö карас котыртöмаöсь музей, кытчö чукöртöмаöсь сiйö кадся эмбур-кабалаяссö. На лыдын и казьтылöм креслöсö.

Бöръя вояссö Василий Александрович служитöма Сöветскöй Союзын, Новочеркасск карын. Пенсия вылö петöм бöрас воöма гортас, Айкатылаö. Весь овны абу вермöма. Нöшта кызь во на веськöдлöма Емдiн районса вöралысьяслöн да чери кыйысьяслöн котырöн.

Вöралöмыс вирас

Василий Александрович казьтылiс, мый ичöтсяньыс «сирасьöма» кыйсьöмö. Тшыг война воясö коми пармаыд вöлöма вердысьöн. Сьöла, дозмöр, кöч... Но абу тай кокни вöлöма найöс кыйны. 13 арöса зонлы велöдысьöн да ыджыдджык ёртöн лоöма Иван Васильевич Разманов суседыс. Сiйö воюйтлöма медводдза мирöвöй война дырйи. Oти тышын чорыда ранитчöма, и веськыд ки лапасö ковмöма вундыны. Кöть и вöлi инвалидöн, Айкатылаын лыддьыссис ыджыд сяма вöралысьöн.

Иван Васильевич петкöдлöма, кыдзи колö октыны лэч, кыдзи зверöс кок туй сертиыс туявны, тулан-урöс кульны. Вочасöн зонмыд велалöма, унатор заводитöма сылöн артмыны. Тадзи сэсся и ыззьöма.

Комиад пармаыд да ю-тыыд быттьö кутшöмкö тыдавтöм вынöн мортто ас дорас кыскомон кысконы. Дерт, сэсся Василий Пасынков, кор сюрлöма стрöка, окотапырысь босьтлöма киас ружьесö. Кыйсьылöма чужан муас да весиг суйöр сайын. Бур вöралысьöн вöлöма. Сiдз, Айкатылаын нин олiгас сяммöма лыйны 21 ошкöс да 5 йöраöс. И абу сöмын чергöдöма. Ыджыдсьыс-ыджыд ош юр лысö Сыктывкарса выставка вылын, кодöс котыртлiс вöралысьяслöн да чери кыйысьяслöн республикаса общество, донъялiсны зарни медальöн. Сэнi жö эзысь медаль вичмис и йöра сюрлы.Тайö пемöссö Василий Александрович туялöмалыйöма Ярега дорысь. Ыджыд, матö 300 килоа, зверь вöлöма. А сюрыс сылöн сывйысь паськыд.

Чучела вöчалысь

Oти кадö Василий Пасынков служитöма Ейск карын. А гарнизонад быд выль юöр зэв öдйö паськалö. Ставöн тöдмалöмаöсь, мый офицер Пасынков - бур вöралысь. Чужöма-быдмöма Комиын, кöнi олысьясыс кынöмпöтсö перйöны тшöтш пармаын да ю дорын. А часьтас вöлöма офицер, кодi «висьöма» вöралöмнас. Нöшта на вöлöма таксидермистöн, мöд ногöн кö, вöчалöма зверь-пöтка мыгöръяс.

Регыд мысти нин найö заводитöмаöсь ёртасьны. Пöшти быд рыт öтвылысь коллялöмаöсь. Кыдзкö öтчыд зарни киа мортыд куляс урлысь кусö. Сэсся сiйöс весалас, сутугаысь нюклялас-вöчас «виряйсö», та бöрын кусö мавтас кутшöмкö сорасöн. И медбöрын кусö зэвтас, вурас, вöчас син... И артмöма быттьö ловъя ур. Аддзылöмторйыс йиджöма Василийлöн сьöлöмас. Сылöн пö со артмö, гашкö, и меным видлыны? Тайö виччысьтöм мöвпыс сатшöма вежöрас, и нöшта на тшöкыдджыка кутöма выль ёрт дорас пыравны. Юасьöма, кыдз да мый колö вöчны, весиг заводитöма мыйсюрööн отсасьны. А коркö сэсся ёртыс козьналöма Василий Александровичлы торъя сорассö, кодöн мавтöма кучик-гöнсö, медым некутшöм гаг эз кöвъясь.

Лоöма сiдз, мый ёртъяслы ковмöма янсöдчыны. Нэм кежлö нин. Капитан Пасынковöс мöдöдöмаöсь бара Германияö. Сэнi нин 1965 воö ачыс вöчöма медводдза пöтка мыгöр. Арнас вöралiгöн лыйöма зукöс. А тайö уткаыс мукöд сертиыс ена торъяло: нырыс паськыд да ыджыдджык, öткодявны кö тушаюрыскöд. Дыркодь бергöдлöма кыйдöссö киас, сэсся босьтöма лэчыд пурт, вожöдöма кусö... Тайö мыгöрсö нэм чöжыс Василий Александрович видзöма. Медводдзасьыс на аддзысьлiгöн шуис, видзöдла пö сы вылö, и тöдлытöг казьтывсьö сэкся на ГДР-ын службаöй, ёртъясöй, ылi муын вöралöмöй. Торъя жö местаын видзлöма ГДР-ын лыйöм косуляяслысь сюръяссö. Кыйöм зверьяслысь сюр-юр лыяссö сiйö кужис видзны. Oд тайö аслыспöлöс паметь.

Пыр чуймöдлiсны пöткаяслöн мыгöръясыс. Найö быттьö ловъяöсь, муртса на пуксьöмаöсь вежöс пельöсö тувъялöм пу вожйö шойччыштны. Со ыджыд чукчи быттьö сьылö нэмöвöйся сьылансö, зiльö мукöд пöткалысь гöлöссö вевттьыны, мед эньыс, кодi ланьтöдчöма муас, буретш сiйöс казялiс да бöрйис. А орччöн кык визяорда тшетшкöны-пинясьöны. Мый бара и юкöны? Сэнi жö ур куткырвидзö, мыжа моз ланьтöма, броткöдчысь гозъя вылö полöмпырысь видзöдö.

Паныдöн — тар котыр. Пöткаяс быттьö шызьöмаöсь, кодкö голясö нюжöдöма, мукöдыс син дорышнас кыйкъялöны пельöслань. А сэнi ёсь гыжъя, крука ныра, öзйысь синма варыш бордъяссö шевкнитöма. Тыдалö, лэбзигмозыс мöвпыштöма кватитны садьсö воштöм котырысь медкажитчана тарсö.

Oткымын ловъя лолöс либö кувсьöмаöс нин вайлöмаöсь сиктса олысьяс, ёртъясыс, челядь. Сiдз, Емдiнысь локтысьяс вайöмаöсь юсьöс. Омöль морт картечöн шковгöма. Доймöм лэбач вежон олöма. Василий Александрович быд ногыс зiльöма бурдöдны сiйöс, ветврачлы весиг петкöдлöма. Но картечыд тай вына. Петöма вöралысь öти асылö, а юсьыд кувсьöма. Олöма мортлöн тöдлытöг синваыс тюрöбтöма. Этатшöм мич вылö, Ен лэбач вылö, киыс кодлöнкö кыптöма. Став уджсö, кöть колö вöлöм карö кайлыны, эновтöма, пуксьöма пызан сайö...

Сiйö юсьсö мойвилiс меным ас синмöн аддзывны. Пöткаыс ловъя кодь, тэрмасьтöг тапсьöдö-восьлалö вежöстi. А сыкöд орччöн руч. Пуксьöма, юрсö кöзяинлань бергöдöма. Думсьыс, дерт, мыйкö чöскыдтор виччысьö... Зепсьыс гöснеч пö перъяс да чöсмöдлас.

*   *   *

Мый лоö тайö зверь-пöткаыскöд? Сьöкыд шуны, кутшöм дум-кöсйöмыс керкасö ньöбысь мортлöн. Но майшöдлö, мый тайö аслыспöлöс озырлуныс вермас вошны.

Газета "Коми му" (Республика Коми) от 23 сентября 2008 года