23.09.2008 11:19
Удора районса Пызьдiн сиктысь Альберт Васильевич Логиновöс, чайта да, миян республикаын бура тöдöны. Тайö водзмöстчысь мортыс öтарö пессьö чужан вöр-ва видзöм-дöзьöритöм вöсна. Быд ногыс отсасьö, шуам, «Серебряная тайга» некоммерческöй региональнöй фондын уджалысьяслы. Некымынысь нин сэтчöс да суйöр сайысь туясьысьясöс нуöдлöма Удораса пармаö. Волöмаöсь весиг ягö, код йылысь гижлöма «Корабельная роща» повесьтын Михаил Пришвин.
Альберт Васильевич сьöрсьыс пыр вöдитö фотоаппарат. Сiйö сяммö казявны чужан мулысь мичсö, снимайтö-серпасалö аслас землякьяслысь олöм-вылöмсö да, дерт, и вöр-васö.
Пызьдiн сикт пуксьöма джуджыд берегö, кöнi Пыис ю усьö Мозынö. Альберт Логинов эскöдö, мый Мозыныс вöльнöй светас медся мича. Сыöн позьö нимкодясьны тулыснас, кор ытва дырйи юыс ойдö-паськалö, гожöмнас — кор ичöт ваыс, лöня шлывгö-визувтö, арнас, кор ваыс быттьö сьöдöдö. Да и тöвнас, кор шойччö кыз йи куд улын, Мозын шензьöдана мича. Веж кöдзыд дырйи, кор пашляк лыйсьö, берегьясас эзысь гыöра пожöм-кыддзыс быттьö сотчöыпьялö шондiлöн кöдзыд югöрьяс улын...
А кутшöм аслыспöлöс Мозын юлöн йылыс. Визув косьясын ворсö ком. Муртса бобув али лöдз сувтовкерас ва веркöсас, кыськö уськöдчас азым чери да ньылыштас шöйöвошöм бордья гагйöс. А здук мысти кöнкö вадорас льöм-ловпу пöвстын шыасьö сьöла. Неылын мöд томиник пöтка сетö ассьыс гöлöссö. Сэсся нöшта öти.
Альберт Васильевич радеитö, вöлöмкö, ветлывлыны Ёкыша вадйö. Сiйö бара жö аслыспöлöс. Сэнi уялö сöмын ёкыш. И весьтысь кузьджыка чериыс оз быдмы. Кадысь кадö ёкышыс быттьö пö дурмö, быд сикас самсö — нидзувсö кöть кыснансö — горша кватитö- ньылыштö. А мукöддырйиыс чери весиг оз дэбнит. Кöнi нöшта эм татшöм вадйыс?
Удора районын мужикулов окотапырысь вуграсьöны да вöралöны. Татшöм сяма оласногыс сэтчö вужьясьöма уна нэм сайын нин. И пöльяс, и батьяс тадзи овлöмаöсь, а öнi пияныс нин талялöны тайö жö ордымсö. Районса öткымын ылi сикт-грездын олысьяс öнöдз на черисö кыйöны важ ногыс. Сiйö жö гымганас. Та могысь потшöны вöрса ёль либö вис. Сир-сынпиыс сэтчö и пырö. Коми мортыд писькöс вежöра. Oд сiйö жö гымгаас чериыд оз кув. Кöть вежон сэнi олас.
Дерт, черисö кыйöны и ботанöн. Oнi, майбыр, татшöм угöддьöсö гöгöр вузалöны. Весиг и Финляндияын кыöмаöс. Кызвыныс вöдитчöны Китайын вöчöманас, кöдi донтöм дай жилкаыс юрсиысь на вöсни. Та вöсна и негырысь кельчи-ёкышыс ёна гартчö-шедö. А на бöрся кыйöдчö сир. Аддзас сiйö пессьысь чериöс да уськöдчö сы вылö. И ачыс веськалö вöйтöм налькйö. Татшöм прамöй кыйдöслы радлыштас быд вуграсьысь. Oд ыджыд сирысь позьö пуны чöскыд юква, позьö и пражитны, пöжавны вомад сылысь черинянь...
Oнi ёна сёрнитöны да гижöны Мылдiн районса Маньпупунер из бöлбаньяс йылысь. Аслыспöлöс дивöыс эм и Мозын вожын, кöнi быдмö ниа. Сiйöс он сывйышт, сы кызта да. Пызьдiнö волысь гöсьтьяс тайö пу дорас пыр фотографируйтчöны. Ас кадö весиг йöзыс вензьöмаöсь, кымын арöс ниаыслы. Альберт Васильевич торья приборöн туялöма да тöдмалöма, мый сылы этша вылö нёльсё во.
Альберт Логиновöс, чайта да, колö ошкыштны зiльöм-водзмöстчöмсьыс. Oд тайö мортыс ас ногыс нимöдö чужан мунымöс.
Газета "Коми му" (Республика Коми) от 23 сентября 2008 года
Автор:
Михаил Ладанов
