Татшöм со кöлöтлив сiйö морт (на коми языке)

Ме кöсъя висьтавны Татьяна МЕЛЕХИНА йылысь, кодi матö 20 во юрнуöдö Койгорт район «Выль олöм» газетлысь удж.

       Надейнö сьöкыдджыка да гажтöмджыка мортлы овсьö свет вылас, абу кö сыкöд орччöн бур ёрт, друг либо подруга, кодкöд колана здукö позьö юксьыны шогнад и долыдлуннад, корны сöвет, а то и асьсö на велöдны олöмö. Меным зэв окота висьтавны Койгортса ань йылысь, кодкöд лоны тöдсаöн меным шуд сетöма, буракö, ачыс Енмыс. Тайö  Татьяна Мелехина, «Выль олöм» газетса медшöр редактор. Кыксё верст миян костын, но найö со уна во чöж нин оз джöмдöдны миян костын бур йитöдъяс.  

Некор оз вун 90-öд вояслöн сьöкыд шöр юкöныс, кодыр удж вылын некымын тöлысьясöдз эз сетлыны  удждон. Надейнö, унаöн ми пиысь падмылiм тайö каднас. Гажтöмыс сэки быттьö   кöвъясьöмöн кöвъясьлiс уна семья бердö. Зэв вöлi сьöкыд кывны уджъёртъяссянь  норасяна кывъяс. И кыдзкö сiдзи артмывлiс, мый медся зумыш лунъяснас Татьяна, кодi быттьö сьöлöмнас кылöма лёк русö,  звöнитас вöлi удж вылö да эзысь жыннян серамнас дзик пыр и пыркöдас меысь шуштöм мöвпъясöс. Татшöм жö збодер да вына энергетикаа вöлi мöд нывбаба, Кöркерöс газет редактор Надежда Быковская.   Некодыр бара сiйö сьöкыд каднад эз няргыв, а мöдарö на: пыр зiлис ёртъяссö кутыштны бур кывйöн да сьöлöмнысö бостчöдны бурланьö. Гашкö, ас костас сылöн кутшöм на бушков омлявлiс, но некор эз норасьлы. Но тайö ань йывсьыс торъя висьт.   

         Коми пединститут гöрд дипломöн помалöм бöрын, Татьяна Мелехина нырыштчас гортланьыс, Койгортö, кöть эськö толка да  зiль нывлы ректорат вöзйылöма пырöдчыны наукаö. Кытысь нö профессоръяслы вöлi тöдны, мый чужан сиктас том нылöс важöн нин виччысьö муса зон, код  дорö Танялöн сьöлöмыс лэбачысь на тэрыба лэбис. Койгортса школаясын том учительтö абу виччысьöмаöсь, да партия райком ыстас Мелехинаöс районнöй газет редакцияö.  

         Сэксянь казявтöг лэбзис нин 27 во. Газетыс лоис Татьяналы мöд гортöн, муса челядьöн, узьтöм войясöн, радлунöн и тöждлунöн. Тайö кадколастнас сяммис уджавны литсотрудникöн и  ответственнöй секретарöн. И со матö кызь во нин главнöй редактор. Мыйта ме сiйöс тöда, мортыс пыр зiлис велöдчыны. Ленинградын политологическöй институт помалöм бöрын дорйис нöшта мöд диплом, код серти вермö уджавны муниципальнöй либо государственнöй служащöйöн. Мем мöвпавсьö, мый Татьяна Алексеевнаысь артмис эськö зэв тöлка депутат, кодi бы сяммис вöчны ас районлы уна буртор, сы вöсна мый сiйö став сьöлöмнас радейтö ас чужан мусö и кöсйö аддзыны сиктса олысьясöс збыльысь шудаöн.

         Ме серти кö, медся тöдчана донъявны позьтöм морттуйыс сыын – йöзкöд йитöд кутны кужöм, йöз вылö видзöдлас. Таня зiльö аддзыны быд мортысь Личностьöс, быдлысь казявны радлунсö, кывны сьöлöм дойсö, и быдöнлы дась отсавны. Сiйö оз куж веськодьпырысь мунны шогалысь морт дортi. Тадзи велöдлöмаысь сйöс бать-мамыс. Та вöсна, гашкö, Татьянаöс зэв пыдди пуктöны и сиктса войтыр, и уджвывса ертъяс.  Надейнö, та вöсна Журналистъялон котыр возйис сiйöс Коми Республикаса Общественнöй палатаö. Веськыда кö нин шуны, ыджыд тöлк ни пöльза тайö котырсьыс ме ог виччысь. Но сэк жö аддза, мый Таня волывлö сэтчöс заседаниеяс вылас оз проста улöс пыкöм могысь либо кворум ради, а палата пыр зiльö петны коми правительствоö да Госсоветcа депутатъяс дорö колана шыöдчöмъясöн. Шуам, Мелехина кöсйö, медым поселокъясын посни школаяс тупкöм бöрти сэтчöс велöдысьяс эз кольны уджтöг, медым сиктса редакцияясын уджалысьяслы сетiсны сэтшöм жö содтöд социальнöй отсöг, кутшöм сетчö бюджетникъяслы. Дасьтöм кабалаяссö ыстöмаöсь депутатъяслы видлалöм вылö. Гашкö пö, коркö и кыласны на йöзлысь шыöдчöмсö, да волас на и миян улич вылö праздник.

         Нöшта воö сьöлöм вылö, кыдзи  Татьяна Алексеевна котыртö редакцияас уджсö да öтувтö уджалысьяссö. Мед ышöдны ассьыс журналистъяссö бурджыка уджавны, зiльö йöзöдны налысь сямлунсö пöшти став конкурсясъын, кодъясöс котыртлöны республикаын. И дерт, медуна козиныс да дипломыс налы и вичмылö. Авторъяслы долыд, а редакторлы кык - пöв. Тайö сiдз жö веськöдлысьлöн зэв колана нырвизь. И вöлi збылысь вывтi любö, кодыр сизим во сайын Таня Мелехиналы сетicны  «Коми Республикаса Заслуженнöй работник» ним.   

Мед и тiянлы олöмыс козьналiс татшöм жö сьöлöма, сюсь да ыджыд сяма матысса ёртöс.