08.10.2008 10:22
Кольöм лунъясö йöза вöлi республикаса Национальнöй библиотекаын. Ассьыс öдзöссö сiйö сё сизимдас кыкöдысь нин восьтiс лыддьысьысьяс водзын. Библиотекаö волiсны юркарса вузъясысь, школа-лицейясысь том ныв-зон. Кодъяскö, гашкö, медводдзаысь на воськовтiсны порог вомöн, но уналы нин Национальнöй библиотека — медматысса да меддона ёрт.
Том йöз водзын сёрнитiс библиотека бердын пöпечительяслöн сöветöн веськöдлысь Р.И.Бихерт. Рейнгольд Иванович висьталiс, мый быд мортлöн олöмын книгаыд зэв тöдчана. Сiйö öттшöтш ышöдö-туйдö бура велöдчыны да уджавны наставникöн. Некутшöм öтуввез оз вермы вежны книгатö.
—Кöсъянныд кö олöмсö вöчны бурджыкöн да лöсьыдджыкöн, некор эн орöдчöй лыддьысьöмысь,—вöзйис томъяслы пöпечительяслöн сöветöн веськöдлысь.
Сэсся томъяс разöдчисны библиотека пасьтала. Oтияс выль небöгъяслöн джадж дорын юасисны библиотекарлысь, кутшöм книгаяс öнi медъёна лыддьöны юркарса войтыр. Мöдъяс периодика жырйын бара жö юасьöны, кутшöм газет-журналъясöн танi позьö тöдмасьны.
Матыстчылi абонемент юкöнын уджалысь Надежда Васильевна Суханова дорö. Тайö аньыс комын квайт во зiльö библиотекаын. Бöръя вит восö сеталö книгаяс абонементын. Юалi нывбабалысь, ёна-ö öнi лыддьысьöны.
—Вöвлi кад, кор кутшöмакö орöдчывлiсны лыддьысьöмсьыд. А öнi матö 6 сюрс морт волывлö быд тöлысь вежлавны книгатö. Тайö, думайта да, абу омöль лыдпас,—тöдчöдiс Надежда Васильевна.
Периодика жырйын вочаасьлi томиник библиотекарь Наталья Валентиновна Иванкинакöд.
—Луннас миянö 50-60 мортöдз кежавлöны. И томъяс, и олöмаяс.
Свежöй газет-журналтö зэв окотапырысь лыддьöны. Дерт, и студентъяс сёр рытъясöдз пукавлöны жö танi. Семинаръяс кежлö дасьтысьöны, диплом уджъяс гижöны и.
Ачыс Наталья Валентиновна чужлöма-быдмылöма Сыктывкарын. Помавлöма Прометей Чисталев нима культура колледж. Oнi уджысь орöдчывтöг велöдчö культуралöн да искусстволöн Санкт-Петербургса университетын. —Вузын велöдчöмыс сетас позянлун нöшта бурджык да ыджыдджык старанньööн танi уджавны, — эскöдö том библиотекарь.
Гарыштлi нин, мый лыддьысьяслысь выль сезон воссигöн татчö корöмаöсь карса вузъясысь, лицей-школаясысь ныв-зонмöс. Библиотекаса уджалысьяс томъяскöд нуöдiсны аслыспöлöс конкурс. Ныв-зон петкöдлiсны литература кузя бур тöдöмлунъяс, а сiдзжö, кыдзи кужöны вöдитчыны книгаöн. Унаöн вöлöм зэв сюся да öдйö аддзöны каталог серти колана небöгтö. И öтуввез отсöгöн сяммöны жö, вöлöмкö, корсьны колана петастö. Конкурсын вермысьясöс пасйисны козинъясöн.
Матыстчылi Сыктывкарса вöр институтысь студенткаяс дорö. Валерия Макарова да Анжелика Торнакова—кык пöдруга. Висьтасисны, мый Национальнöй библиотекаö тшöкыда волывлöны. Oти-кö пö, радейтам лыддьысьны. Мöд-кö, библиотекаыс вöр институткöд орччöн. Он кöсйы да, пыран. Нывъяс лоасны вöр овмöсса инженеръясöн. Мед жö налы тшöтш небöг-книгаыд отсалас зумыда восьлавны водзö олöмас.
Газета "Коми му" (Республика Коми) от 7 октября 2008 года
Автор:
Валерий Каракчиев
