Коммуö, Перым-Коми кытшö (на коми языке)

(Заводитчö газетлöн 151-öд, 155-öд ножеръясын.)

Гöра бокын, сад пöвстын

Виктор Савинлöн «Коммуын. Коми-пермяк округöд ветлöм-мунöм» очеркысь лыддя: «Юсьвасянь Кудымкарöдз туйыс, километр 8 кузя, мунö бара вöраинтi.

Oкмыс километр сайсянь, бура джуджыд чой йывсянь, тыдовтчис Кудымкар. Ылiсянь видзöдiгöн дзик миян Сыктывкар кодь: гöра бокын, сад пöвстын...»

Ми Кудымкарас Юсьваладорсянь жö воим. Но эг эськö шу, мый вöраинтi туйыс мунö, стöчджык лоас шуны - вöр дiяс дiнтi. Oтарас и мöдарас паськыд видзьяс да муяс. Автобуснад абу вöлöн мунöмыд, муртса син водзö сувтiс карыс, кыдзи ми сэтчö воим нин. Уличьяс кайласны мылькъяс вылö да бöр лэччасны, пöлöныс пуяс вежöдöны. И збыльысь: «гöра бокын, сад пöвстын».

Медводз кежалiм карса шöр площадьдорса паркö. Том йöз пö лабичьяс сэтчö сувтöдöмаöсь, а мышкас перым-коми шусьöгъяс да кывйöзъяс гижöмаöсь - водзджык нин тайöс миянлы висьтавлiсны. Но, гижöма - и мед, мый сэнi шензьöданаыс. А Кудым Ошлы памятник дорын снимайтчим да вуджим туйсö паркланьыс, аддзим лабичьяссö - и шызим! Пу лабич сулалö, мудзин кö - пуксьыштлы, эн кö - водзö мун. Но кыдзи нö он пуксьыштлы «Гöтрасьны - абу кöм кöмавны» гижöда лабич вылас! Либö со - «Пуксьы да ваксьы». Быть пуксьылам и ваксьыштам! Мыйла и миян Сыктывкарын татшöмсö оз позь вöчны? Коми-зыряналöн ышöдана да нюмсера шусьöгкывйöзыс абу али мый?

Кудымкар сулалö Кува да Иньва юяс öтлаасянiнын, Изъюр нима гöра бокын. Зэв нин важысянь татчö овмöдчылöмаöсь: ылöдз гöгöр тыдалö, вöрöгтö ылiсянь на казялан да дорйысьны дасьтысьны удитан. Кува ю пöлöныс пö кузяла вывтасiнъяс да уналаысь нин важ йöзлöн овмöдчылöминыс сюрöма. Кольöм нэмын Кува вомсö потшлöмаöсь, артмылöма ыджыд пруд, вöлöма электростанция. Некымын во саиын косьтомаось прудсö, öнi весалöны пыдöссö. Регыд пö бöр кутасны васö чукöртны. Кудымкарсалы телепит, мед эськö öдйöджык нин бöр прудсö лöсьöдасны. И ме гöгöрвоа найöс. Изъюрсяньыс öд сэтшöм мича местаяс тыдалöны - сьöлöмнад и ловнад шойччан, тайö му вылас лöсьыд олöмас эскан.

Эзысь тасьтiяс

Сэсся мунiм карса музейö. Меститчö сiйö вичко джынйын, мöдас службаяс мунöны. Миянлы экскурсиясö нуöдiсны перым-коми кыв вылын, майшасьыштiсны на, гежöда пö корлöны ас кывйöн висьтасьны да, гашкö, оз ставыс лючки артмы. Но весьшöрö майшасисны, ми ставсö гöгöрвоим, мыйкö ко содтод косйим тöдмавны, комиöн жö и юасим.

Вичкосьыд пö миянöс корöны мунны да, мыйкö выльтор лöсьöдны ог лысьтöй. Вуджöдасны кö пö миянöс татысь кытчöкö, экспозициятö ковмас разьны. Но и öнi петкöдланторйыс шензьöдана уна, и ставсö меститöмаöсь лöсьыда, быдтор аслас местаын. Торйöн корисны видзодлыны саманит эзысьысь тасьтiяс. Весиг пö Эрмитажö нулiсны найöс туявны-донъявны. Сыктывкарö бергöдчöм бöрын нин аддзысьлi нималана художник Аркадий Мошевкöд. Рöднас сiйö Перым-Коми кытшысь, кутшöмкö кад уджавлöма Кудымкарса музейын, сы вöсна и зэв бура тöдö важ комияслысь оласногсö. Кор висьталi сылы тасьтiяс йывсьыс, Аркадий Васильевичлöн синъясыс ловзисны, югдiсны весиг, найöс пö ме аддзи.

- Локтiм экспедицияöн öти сиктö, - казьтылiс сiйö. - Меным колiс серпасавны керка. Пукси кер вылö, а водзын курöгъяс кокасьöны кутшöмкö тасьтiысь. Видзöда да, зэв нин важся сiйö, аслыспöлöс. Кори кöзяйкаыслысь тасьтiсö, а Кудымкарын видзöдлiсны да шуöны, тэ пö ачыд на, тыдалö, он гöгöрво, мый аддзöмыд. Бöр ыстiсны менö сиктас, гашкö пö, нöшта на аддзан. Мунi да, нывбабаыс висьталö, уна пö вöлi эськö татшöм тасьтiыс да, вошласисны нин кытчöкö. Чойлöн, гашкö, эм на, ветлы сы дорö. Сюри öд.

И со тайö аддзöмторйыс öнi Кудымкарса музейын медтыдаланаинас.

Том войтыр кöсйöны ёртасьны

Музейöн тöдмасьöм бöрын миянöс виччысисны Кудымкарса том войтыр. «Ёрта кар» экспедициялöн фольклор чукöртöмысь öтдор вöлi и мöд мог - лöсьöдны Перым-Коми кытшса том йöзкöд йитöдъяс. Том финн-йöгралöн войтыркостса ассоциацияысь президент Алексей Рассыхаев да коми том войтырлöн «Ми» котырöн веськöдлысьöс вежысь Владлен Зварич водзмöстчисны Кудымкарысь «Роза ветров» котырын зiльысьяскод аддзысьлом котыртöмын.

Ми висьтасим, мый Комиын вöчöны том йöзыс вужвойтырлысь кыв да культура видзöм могысь, найö юксисны асланыс тöжд-могöн. А сэсся видзöдлiм, водзö вылö кутшöм öтувъя удж позяс вöчны. Тыдалiс: ёртасьны кöсйöмыс öтарсянь и мöдарсянь зэв ыджыд. Кöть и торйöн, но öд öти удж вöчам, и мукöддырйиыс, вöлöмкö, öти сикас мöвпъяс юраным чужлöны. Шуам, искусство гимназияса этношöрин гозмöд во сайын збыльмöдiс Ханты-Манси кытшын олысь коми-изьватаскöд ёртасьöмлы сиöм «Зыряна туй» уджтас. А аслыспöлöс пасöн сылöн вöлi кузь еджыд дöра, кытчö быдöн вермис гижны ассьыс мöвпъяссö, кöсйöмъяссö, сиöмъяссö, мыйкö серпасавны, пысыштны-вурыштны. Сыктывкарысь тайö пасыс ветлiс Изьва районö,

Сибырö обдорса комияс дорö, катöдлiм сiйöс и Ураллöн медджуджыд Народа гöра вылö. А Перым-Коми кытшын таво тöв нуöдöмаöсь «Кудымкар - том йöзлöн кар» уджтас, да паснас еджыд дöра жö лöсьöдлöмаöсь, «Зыряна туйö» моз быдöн вермöма гижны асланыс юркарлы сиöм пасйöдъяс.

Эскыссьö, том коми-зыряна да коми-пермякъяс костын ёртасьöмыс и водзö кутас ёнмыны, öд и Комиын, и Перым-Комиын унаöн водзмöстчöны ас кыв, культура, традицияяс видзöмын да сöвмöдöмын.

Войвывлань

Кудымкарсянь мöдöдчим Коммулöн войвылö, Коса районса Бачманов сиктö, а öтпырйö кежалiм тшöтш Юксеево да Пармайлово сиктъясö. Кыдзи бара он казьтышт Нёбдiнса Виттортö, сiйö öд тшöтш вöлöма и кытш лунвылын, и войвылас: «...лöсьöдчим ветлыны Кöчö (Кочево, 87 километр Кудымкарсянь войвывлань)».

Юксеевоас тöдмасим мыжтöг мыждöмаяслы сиöм музейöн. Унатор сэнi вöчöма Фёдор Утробинлöн киöн. Пармайловоысь киподтуя морт пуысь вöчалö омöльясöс, повзьöдчысьясöс - найö пö, шуö, ме кодьöсь жö да ми öтамöдöс гöгöрвоам. Пармайлово грезд нималö нöшта «Кукушка» ансамбльöн. Скульптор да сьылысьяс виччысьöмаöсь нин миянöс, пыр жö корисны пыравны мойдын моз замок кодь керкаö, чöсмöдлiсны перым-комилöн сёян-юанöн. Туй вывсьыд пö медводз шойччыштöй, сёйыштöй, а сэсся тöдмасям, сьылыштам-ворсыштам. Коми Республика йылысь ёна юасисны, öткымынлöн рöдвужыс танi олö да, нимкодьпырысь тайöс висьтавлiсны.

Сэсся ывлаас петiм да пöттöдз на гажöдчим, öтамöдöс сцена вылын вежöмöн сьылiм коми да перым-коми сьыланкывъяс, йöктiм, ворсiм. А колльöдiсны хороводöн, быдöнöс ыдждöдлана сьыланкывйöн нимöдöмöн.

(Водзö лоö на).

Газета "Коми му" (Республика Коми) от 7 октября 2008 года